วีชูปเมน จ วจฺฉตรุณูปเมน จ อุปทสฺเสตฺวา ภควนฺตํ ปสาเทสุํ ขมาเปสุํ นิชฺฌตฺตํ
อกํสุ ฯ กึ นุ โข ภนฺเต นาคเสน อญาตา ตา อุปมา ตถาคตสฺส ยาหิ ภควา
อุปมาหิ ปสนฺโน โอรโต ขมิโต นิชฺฌตฺตกโต อุปสนฺโน ฯ ยทิ ภนฺเต นาคเสน ตถาคตสฺส
ตา ว อุปมา อญาตา เตนหิ พุทฺโธ อสพฺพญฺญู ฯ ยทิ ภนฺเต ญตฺวาา ทวกมฺยตา
วีมํสาเปกฺโข ปณาเมสิ เตนหิ ตถาคตสฺส อการุญฺญตา ภาติ ฯ อยมฺปิ อุภโต โกฏิโก
ปญฺโห ทุรานุโพโธ โส ตวานุปฺปตฺโตติ ฯ
สพฺพญฺญู จ มหาราช ตถาคโต เตหิ จ อุปเมหิ ภควา ปสนฺโน โอรโต
ขมิโต นิชฺฌตฺตกโต อุปสนฺโน ฯ ธมฺมสฺสามี มหาราช ตถาคโต เต จ เทวมนุสฺสา
ตถาคตปฺปเวทิเตเนว อุปเมน ภควนฺตํ ปสาเทสุํ ฯ ยถา มหาราช อิตฺถี สามิกสฺเสว
สนฺตเกน ธเนน สามิกํ อาราเธติ โตเสติ ปสาเทติ ตญฺจ สามิโก สาธูติ อภินุโมทติ
เอวเมว โข มหาราช ปาตุเปยฺยกา สกฺยา พฺรหฺมา จ สหมฺปติ ตถาคตปฺปเวทิเตเนว
อุปเมน ตถาคตํ อาราเธสุํ ปสาเทสุํ เตสญฺจ ตถาคโต สาธูติ อภินุโมทติ ฯ ยถา
วา ปน มหาราช กปฺปโก นาม รญฺโญ สนฺตเกน สุวณฺณปตฺเตน รญฺโญ อุตฺตมงฺเค
ปสาธยมาโน ราชานํ ปสาเทติ ตสฺส ราชา ปสนฺโน ยถิจฺฉกมนุปฺปเทสิ เอวเมว โข
มหาราช เต ตถาคตํ อาราเธสุํ เตสญฺจ ตถาคโต สพฺพทุกฺขปริมุตฺตึ เทเสติ ฯ ยถา
วา ปน มหาราช สทฺธิวิหาริโก อุปชฺฌายสฺส ภตฺตํ อุปนาเมนฺโต อุปชฺฌายํ อาราเธติ
ปสาเทติ ตญฺจ อุปชฺฌาโย อภินุโมทติ เอวเมว โข มหาราช ปาตุเปยฺยกา สกฺยา พฺรหฺมา
จ สหมฺปติ ตถาคตปฺปเวทิเตเนว อุปเมน ตถาคตํ อาราเธสุํ ปสาเทสุํ โตเสสุํ เตสญฺจ
ตถาตโต สาธูติ สมฺปฏิจฺฉตีติ ฯ สาธุ ภนฺเต นาคเสน ตถา สมฺปฏิจฺฉามีติ ฯ

พุทฺธสพฺพญฺญูสยปณามปญฺโห จตุตฺโถ ฯ

ภนฺเต นาคเสน ภาสิตํ เจตํ ภควตา
อนิเกตํ อนาลยํ เอตํ เว มุนิทสฺสนนฺติ ฯ
ปุน จ ภควตา ภณิตํ
วิหาเร การเย รมฺเม วาสเยตฺถ พหุสฺสุเตติ ฯ
อยํ อุภโต โกฏิโก ปญฺโห ฯ เป ฯ นิพฺพาหิตพฺโพติ ฯ

ภาสิตํ เจตํ มหาราช ภควตา
อนิเกตํ อนาลยํ เอตํ เว มุนิทสฺสนนฺติ ฯ
ปุน ภณิตญฺจ
วิหาเร การเย รมฺเม วาสเยตฺถ พหุสฺสุเตติ ฯ
ยํ มหาราช ภควตา ภณิตํ วจนํ อนิเกตมนาลยนฺติ ตํ อเสสวจนํ นิรวเสสวจนํ
นิปฺปริยายวจนํ สาณานุวิจฺฉกํ สมณสารุปฺปํ สมณปฏิรูปํ สมณารหํ สมณโคจรํ
สมณปติฏฺฐิตํ ฯ ยถา มหาราช อารญฺญิโก มิโค อรญฺเญ ปวเน จรมาโน นิราลโย
อนิเกโต ยถิจฺฉิตํ ยาติ เอวเมว โข มหาราช ภิกฺขุ อนิเกโต อนาลโย เอตํ เว มุนิทสฺสนนฺติ
จินฺเตยฺย ฯ ยํ ปน มหาราฃ ภควตา ภณิตํ
วิหาเร การเย รมฺเม วาสเยตฺถ พหุสฺสุเตติ
ตํ เทฺว อตฺถวเส สมฺปสฺสมาเนน ภควตา ภณิตํ ฯ กตเม เทฺว ฯ วิหาร ทานํ
นาม สพฺพพุทฺเธหิ วณฺณิตํ โถมิตํ อนุมตํ ปสํสิตํ เต วิหารทานํ ทตฺวา ชาติชรา
พฺยาธิมาเณหิ ปริมุจฺจิสฺสนฺตีติ อิทํ ปฐมํ วิหารทาเน อานิสํสํ ฯ ปุน จ ปรํ มหาราช
วิหาเร วิชฺชมาเน พหู ภิกฺขู วิยตฺตา ภวิสฺสนฺติ สุลภา ทสฺสนกามานํ อนิเกตา ทุทฺทสา
ภวิสฺสนฺตีติ อิทํ ทุติยํ วิหารทาเน อานิสํสํ ฯ อิเม เทฺว อตฺถวเส สมฺปสฺสมาเนน
ตถาคเตน ภณิตํ
วิหาเร การเย รมฺเม วาสเยตฺถ พหุสฺสุเตติ ฯ
น ตตฺถ พุทฺธปุตฺเตน อาลโย นิเกเต กรณีโยติ ฯ สาธุ ภนฺเต นาคเสน ตถา
สมฺปฏิจฺฉามีติ ฯ

อนิเกตานาลยกรณปญฺโห ปญฺจโม ฯ

ภนฺเต นาคเสน ภาสิตํปิ เจตํ ภควตา
อุตฺติฏฺเฐ นปฺปมชฺเชยฺย อุทเร สํยโม สิยาติ ฯ
ปุน จ ภควตา ภณิตํ อหํ โข ปน อุทายิ อปฺเปกทา อิมินา ปตฺเตน สมติตฺติกํปิ